A profesora do Departamento de Lingua Española Rosa Pérez Rodríguez é a nova decana da Facultade de Filoloxía e Tradución da Universidade de Vigo. A súa candidatura, a única que concorría aos comicios celebrados este mércores, obtivo 50 votos a favor, sete en contra, oito en branco e un nulo. En total, participaron na votación 66 das 92 persoas convocadas, o que representa unha taxa de participación do 71,7%.
Pérez Rodríguez toma así o relevo de José Montero Reguera, á fronte do centro desde 2020, e inicia unha nova etapa acompañada por un equipo integrado por profesorado de distintos departamentos da facultade. Liliana Valado Fernández, do Departamento de Tradución e Lingüística, será a secretaria; Valentina Marta Rodríguez, do mesmo departamento, ocuparase de Calidade; María Platas Alonso, do Departamento de Filoloxía Inglesa, Francesa e Alemá, asumirá as competencias de Estudantes e Vida Universitaria; José Carregal Romero, do mesmo departamento, responsabilizarase de Internacional; e Rocío Hernández Arias, do Departamento de Literatura Española e Teoría da Literatura, estará á fronte de Organización Académica.


