Nun contexto de mobilidade internacional crecente a presenza de persoas con orixes, culturas e linguas diferentes é unha realidade que permea todas as capas e servizos que ofertan as sociedades nas que se insiren. “A Área Sanitaria de Vigo atende unha poboación diversa, e desde a perspectiva da xestión, debemos procurar que as dificultades de comunicación entre os profesionais sanitarios e os pacientes se aborden mediante recursos adecuados, criterios de actuación e unha maior sensibilización dos equipos asistenciais”, explica Francisco Jesús Represas, subdirector de Humanización e Atención á Cidadanía da Área Sanitaria de Vigo, que tamén lembra, que as barreiras de comunicación non se limitan ás diferenzas idiomáticas e que persoas con discapacidade auditiva, dificultades cognitivas ou limitacións funcionais poden precisar medidas específicas para garantir unha comunicación efectiva.
Que os profesionais da sanidade coñezan a formación que recibe o alumnado que cursa estudos de tradución e interpretación na UVigo, “as características deses estudos para que os intérpretes se rexan por un código deontolóxico, para que coñezan a terminoloxía, neste caso sanitaria e saiban enfrontar as barreiras culturais”, detalla a catedrática do Departamento de Tradución de Lingüística da UVigo Maribel del Pozo Triviño; e, que o alumnado, a súa vez, se achegue a como se traballa nos hospitais cando se precisan tradutores e intérpretes, son os obxectivos da I Xornada Tradución e cousas médicas que se celebrará o 9 de novembro no Hospital Álvaro Cunqueiro de Vigo. Organizada polo instituto iLingua e o centro hospitalario, con esta xornada, “o iLingua e a UVigo reforzan o seu compromiso cos dereitos humanos e cuns servizos públicos de calidade, non só educativos, senón tamén médicos, ademais de visibilizar o papel fundamental das investigacións que se fan na Universidade de Vigo sobre a interpretación, a tradución e a mediación no eido de medicina”, explica María Méndez, docente e investigadora do Departamento de Lingua Española e secretaria de iLingua.


